Марий калык конгрессын председательже Эдуард Иманаев Марий Элын Санкт-Петербургышто полномочный представительже Елена Таникова дене вашлийын.
Икте-весе дене палыме лийме деч посна Марий калык конгресс дене могай пашам пырля ышташ лиймым каҥашыме.
“Тыгай йӧн уло, иктаж проектыш пырля ушнен, Марий Эл Республик нерген Россий кӱкшытыштӧ утларак палдарен кертына. Санкт-Петербургыш мийымекем, мый тиде йодыш шотышто командыште улшо йолташ-влак дене пырля каҥашен налына, мом ышташ лиймым рашемдена. Пашам ышташ шонымаш уло марий йылмым туныктымо шотыштат, чапланыше марий художник-влак дене кылым ыштен, кугу олаште нунын сӱретыштым калыклан утларак палдараш да молат”, – мане Елена Сергеевна.
Е.Таникова шкеже Курыкмарий район гыч, Санкт-Петербургышто 1998 ий гыч ила. Тӱвыра аланыште тырша, шанче пашам шукта. Тудо тыгак кӱсле, скрипке да моло икмыняр семӱзгар дене шокта.Ленинград областьысе марий-влакын «Ший корно» автономийыштым ыштымылан тений 10 ий темеш. Тидын вашеш июнь тылзыште пайрем вашлиймаш тушто лийшаш, посна программе ямдылалтеш. А шыжым вес проект почеш Санкт-Петербургыш Марий Эл гыч кӱслезе ансамбльым выступатлаш ӱжаш палемденыт.
Е.Таникова (покшелне), Э.Иманаев да “Кугарня” газетын пашаеҥже Э.Терентьева дене пырля.
